Dhinawan ngay.

Ngaandiyaa dhaay 'naawaandaay, bagaarr nhamanha yanaay. Waama nguu warray bagaaya. Dhurraamilday ngaama, waal nganunda ngaandiyaabadhaay yanaay, gaay guwaalday.gu.

Yilaalanga, ngaya yanaanhi ngaama. Ngaya yanaaygu guwaay. "Yanaya, yanaaya, garriyabala nguwalay warraylaya!" Yilaala nhamanga gayarranhi, yanaay.gu. Giirr yanaanhi, ngarraagulay, minyaarruwaa, ngiyarrmanga warraylanhi, ngaarrma dhinawan ngay.

Giirruu nhama yiiliyanbaa. Waal ngaama ngaandiyaa nganunda waal yanaaylay, giirruu ngiyarrma nguu dhurri bamba.

Ngiyarrmadhaay ngaama dhayn yanaawaanhi wiyaybaa. Ngiyarrma nguu ngarray ngaama dhinawan ngay, warraylandaay. Nhamanhabala dhirra 'naawaanhi, dhuwarrbiyaay, dhuwarr gaawaanhi. Dhinawan ngaama nguungunda yanaanhi, dhuwarr ngaama dhaligu.

Ngaam-bala nguu wuurraanhi, wuurraanhi, dhuwarr. Yilaala nguu ngaama dhunhi, dhuwarr, dhudhay nguu ngaama dhuwarr.

Ngaambala nguu, dhayndu bumay bundidju, dhaygali. Ngiyarrma nguu ngaamanga buurray. Ngiyarrma nguubala ngaarrma gurru mawunhi, dhawumaligu. Ngiyarrma nguunga bamba dhay.

Buyumadhuul!