Guwaabal
12 Wuulaa, Gilaa / Frilled Lizard and Galah
|
Winangala!
Listen to the story continuously in Yuwaalaraay by clicking on the
loudspeaker symbol (left).
Note that the sound file is quite large (100Kb) and may take some
time to download.
Alternatively, listen to the story in parts by clicking the 'play'
button in the column below. |
|
Like
to know more?
Visit Version
2 to see the story presented sentence by
sentence and translated into English. There
is also an 'interlinear' translation which
shows Yuwaalaraay word-building, verb tenses
and suffixes.
Go
to the Notes page to find
out the background to the story. |
|
|
|
Wuulaa, Gilaaa |
|
Wuulaagu guwaay nhalay
gilaa: "Ay, baayamba, baayamba, gababala ngay barran; ngay nhamanha
barran; barranbala ngay gaba, nginubala gagil. |
|
Gilaagubala
guwaay, "Garriya, garriya, gababala ngay barran." |
|
[Wuulaa:] "Ngaan, Gababala
ngay barran." |
|
[Gilaa:] "Wanangabadhaay baayamba,
wananga!" |
|
[Wuulaa:] "Waal, nginda waanda,
nginda waanda wananga." |
|
[Gilaa:] "Ngaayaybaay." Giirr wananhinga
Gilaagu. Ngaarrigulay, yalagidhaay nhama dhurray, yalagidhaay nhama
dhurray, barran, ngaamanga bundaanhi, guwiinbaaga dhinaga. |
|
Gilaagu guwaay: "Ngaa, Wuulaa, nginda
gayadhanga wananga." |
|
Wuulaagu guwaay: "Warraya baayamba,
banagaya baayamba, barrandu nginunha bumalinga." |
|
Waal. Waal warranhi, waal banaganhi. |
|
Giirr Wuulaagu barran wananhi. Ngaarrigulay
nhama barran, ngaarrigulay, yalagidhaay nhama, yalagidhaay. Yalagidhaay
ngaama dhurralaanhi. |
|
[Wuulaa:] "Warraya, banagaya barraay."
Ngaarrima dhaay nhama, dhurraluwinyi barran. Bumay nhama gilaa dhaygali.
Nhalaybala ngaama gilaa yugilanhi, bambanha yugilanhi ngaama gilaa, |
|
[Gilaa:] "Yagaay, yagaay." Yilaa
ngaamanga guwaybil. |
|
[Wuulaa:] "Giirr nginunha bumanhi
nhama, nginunha guway dhurraabamaldaay." "Ngaa, ngayabala giyaanha
banagay dhuwinbaygu." Waama wuulaabala ngaama banaganhi, dhuwinbanhi
nhamanga wuulaa, bindiyaaga. Ngiyarrmanha dhuwinbaylanhi. |
|
Giirr Gilaagu Wuulaa gayarragilanhi,
gayarragilanhi. [Gilaa:] "Minyaayawaa nhama Wuulaa, minyaaya nhama
Wuulaa?" "Giirr ngaya giyaanha nginunha biyuurrali bindiyaaga. Bamba
ngaya nginunha biyuurralday." Giirr dhugay guway dhurralaanhi, dhaygali,
biidja. |
|
Wuulaabala dhanduwiylanhi, dhuwinbaylanhi,
dhuwinbaylanhi. Giirr ngarray Wuulaa nhama Gilaagu. Yilaanga bayamay
nhama, biyuurray. Wuulaa biyuurray bindiyaaga Gilaagu, biyuurray,
biyuurraldanhi, biyuurraldanhi. |
|
Ngiyarrmanga bindiyaa dhuwinyi,
bawaga, nhanda, wuyuga ngayagay. |
|
Yalagiirrma nhama yanaaylanha bindiyaabiyaay, ngaarrma Wuulaa, nhama biyuurraldaay bindiyaaga, Gilaagu. Nhalaybalanga Gilaa guwaybiyaay yanaaylanha. Guwaymbarrangabala bii nguungu. Guwaymbarra bii nhamanha 'naaylanha, dhaygalbala nguungu maayrr yadhaarr, waalbala yadhaarr dhurralaanha gaburranda dhaygala.
|
|
|