|
|
Dhinawan bulaarnha Gumbulgaban |
|
Dhinawan burrul dhigayaa
gigilanhi. Nhamanha burrul dhuurranmay. Gumbulgaban buul warranhi.
Gumbulgaban ngambaadhi burrul buul warranhi dhinawan ngambaadhi. Baayan
nguu ngarraldandaay ganunga baraylandaay ngarribaa, barraay banagaylandaay.
Gumbulgabandu winangaylanhi dhirrawan.gaan-nha gigilanhi, dhinawandu
bungun nguungu biiwanmaldandaay. |
|
Gumbulgabandu
winangaylanhi: gulaarr ngayanga guwaali dhinawan gimbila: "Waal nginda
dhuurranmay gigilaygu." |
|
Baayan nguu winanganhi bungun
garraygu, waalnha baraylaygu. "Waalbadhaay ngaya burrul gigilanha
bumaligunha. Ngayabadhaaynga wagi guwaali: Maayrr ngay bungun gigilandaay."
|
|
Yilaa nguu ngarray dhinawan 'naawaandaay.
Gumbulgaban yilawanhi, bungun nguu wuunhi, nguwalay baayan ngarranhi
banya[?] duul. Baayan bulaarrnha guwaalaylanhi: |
|
Gumbulgabandu guwaay: |
|
"Minyagu nginda waal bungundhalibaa
gigilanha? Ganunga dhigayaa baraylanha. Waal bungunnginda dhuurranmay.
Maayrr ngay bungun gigilanha. Ganugu nganhalaa dhuurranmay gimbili." |
|
Dhinawandu guwaay: "Giirr nginda
bungunbiyaay." |
|
[Gumbulgaban:] "Waal". |
|
'Naanhi dhinawan nguungu guliiya.
Baayan bulaarrnha badhanha ginyi. "Bungunbadhaay ngali garray; waal
gumbulgaban dhuurranmay gigi." |
|
Dhinawandu gunidjayu guwaay guliirr
nguungu bungun garraligu gambugu. Baayan nguu gayadha nguungu bungun
garray. Baayannha banagawuwinyi gumbulgabanda. |
|
Dhinawandu guwaay gumbulgabanda:
"Bungun ngaya garray." |
|
Gumbulgaban gindamanhi, baanhi,
banaganhi dhirra ginyi nhamanha. Bungun biiwanmay, baayan nguu guwaay
dhinawan: "Dhanggiway nginunha ngaya; badjinduul bungun. Maayrrbuu
ngaya ngay bungun garraldanha. Wamba nginda badjinduul bungun." |
|
Dhinawan banaganhi bumaligu gumbulgaban,
baayan gumbulgaban baranhi. Ngarragaadhuul, maayrrngay bungun. |
|
Baayan dhinawan yiilinha ginyi,
yanaanhi. "Yilaa ngayanga nginunha gulaarraa gimbili." Yilaalanha
nguu winanganhi. Baayan nguu dhurrinbay birraliigal; bulaarryiyal
ngadaa nguu way. Burrulaa binamayaaga way. |
|
Baayannga murriladhaay gaarrimaygu
nguungu bulaarr nguu gaawaanhi. Baayannga wagigu 'naanhi. Gumbulgabandu
birraliigalgu wuudhandaay ganungu gaawil |
|
Baayan bulaarrnga guwaalanhi. Dhinawandu
guwaay gumbulgabanda. "Minyagu nginda burrulaa birraliigal gaagilanha?.
Waal nginda burrulaagu gaawil wuudhay. Dhagil nginda bulaarryiyal
gaagilay; baayan bulaarrnha burrul gigi; waal nginda burrulaagu gulunmalday." |
|
Gumbulgabanbadhaay winanganhi. "Gulaarr ngaya ngay birraliigal burrul yalagiirray dhinawan? Bulaarryiyal ngay gigilandaay, yaama bulaarrnha burrul gigi yalagiirray dhinawan." Winanganhi nguu dhanggiway. Baayan nguu ngarray dhinawan, ngarray nguu burrul.
|
|
Baayan nguu guwaay: "Bumali ngaya
ganunga, bulaarryiyal ngaya garrawalday. Dhinawan waal dhuurranmay
gigilay wagigu. Gumbulgaban-yiyal gigilay dhuurranmay. Gumbulgaban
burrul gigi yalagiirray dhinawan, bungun ganugu garrawalday. |
|
Baayan nguu bumay ganunga birraliigal,
bulaarryiyal nguu garraway. Baayannga dharrawuluwinyi nhamanga dhinawandu
dhaldandaaygu. |
|
Dhinawandu gagay: "Minyaaya nginu
birraliigal?" |
|
[Gumbulgaban:] "Ganunga ngaya bumay.
Bulaarryiyal gaagilanha?" |
|
[Dhinawan:] "Walandu yuulu nginda
bumay. Burrulaa ngay birraliigal, gulunmaldanha ngaya ganunga. Burrulaa
ganunga. Ngarrala ngawil dhuwayu bulubanhi. Ngarrala bunbun. Nhama
ngaya bayamaldanha ngay birraliigalgu. Bulaarryiyal nginu birraliigaali.
Burrulaabala ngay. Ngaya dhaay gaagi nginunda ngarranmaligu." |
|
Dhinawan banaganhi binamayaagu,
ngayrr nguu dhurrinbandaaygu birraliigal. Baayan nhamanha dharrawuluwinyi,
dhirrabil ginyi nguu bubudhala, guwaaldandaay "buum, buum". Birraliigal
nguungu banagaylandaay, biwiirrir ngarrawaandaay, wiiliirr wiilawaanhi,
dhurrandaay, baayannha yiili ngarranhi. |
|
Baayan nguu guwaay. "Giirruu ngaya
nginunha guwaay. Ganunga ngaya ngay birraliigal garrawaldanha. Ngarrala
nhamanga. Nginu ngarragaa birraliigal. Bumay nginda nginu birraliigal.
Nginda nganha dhanggimay. Dhagil ngayalaa yanaaylay ngaya bungunnginda,
ngindabala bulaarryiyal birraliigaali gaagilay. Garrawalday nginu
bungun, ngayalaa giirruu garrawalday ngay birraliigal." |
|